Në një operacion të gjerë policor të koduar “No Chance”, autoritetet shqiptare kanë arrestuar 8 anëtarë të një grupi kriminal të përfshirë në falsifikimin e dokumenteve dhe ndihmën për kalim të paligjshëm të kufirit.
Operacioni, i realizuar më 12 Shtator 2024, u koordinua nga Drejtoria për Hetimin e Narkotikëve dhe Trafiqeve në bashkëpunim me Drejtoria e Forcës së Posaçme Operacionale dhe Departamentin e Policisë Kriminale, nën drejtimin e Prokurorisë së Gjirokastrës.
Gjatë aksionit, u zbuluan dhe u sekuestruan një laborator që shërbente për falsifikimin e dokumenteve, një shumë të konsiderueshme parash, automjete dhe sende të tjera të lidhura me aktivitetet kriminale. Laboratori ishte i specializuar në krijimin e dokumenteve të falsifikuara për ndihmën në kalimin e paligjshëm të kufijve.
Pjesë e operacionit ishin edhe arrestimet e dy shtetasve iranianë, të cilët ishin të përfshirë në grupin kriminal.
Gjykata e Shkallës së Parë e Juridiksionit të Përgjithshëm në Gjirokastër ka caktuar masën e sigurisë “Arrest në burg” për të gjithë të arrestuarit, të cilët përballen me akuzat e “Ndihmës për kalim të paligjshëm të kufijve”, “Falsifikimi i dokumenteve”, “Falsifikimi i formularëve, stampave dhe vulave” dhe “Ushtrimi i ndikimit të paligjshëm te personat që ushtrojnë funksione publike”.
Operacioni “No Chance” shënon një sukses të rëndësishëm në luftën kundër krimit të organizuar dhe falsifikimit të dokumenteve, duke theksuar angazhimin e autoriteteve për të zbardhur aktivitetet kriminale dhe për të siguruar ndëshkimin e të përfshirëve.
Hetimet vazhdojnë për të identifikuar dhe ndaluar çdo individ të lidhur me këto veprimtari të jashtëligjshme.