Një rast i rëndë ka ndodhur në Korçë, ku një vajzë 14-vjeçare solli në jetë një vajzë në maternitetin e qytetit një ditë më parë. Pak orë më vonë, policia ndaloi bashkëjetuesin e saj 21-vjeçar, D.K., për akuzën e “Marrëdhënieve seksuale ose homoseksuale me të mitur”.
Pas pranimës së atësisë së fëmijës, 21-vjeçari përfundoi në arrest, ndërsa e mitura kërkon lirimin e tij, duke sqaruar se ajo është e martuar me të riun prej më shumë se një viti dhe se nuk ka ndodhur ndonjë abuzim. E mitura dhe familja e saj pohojnë se martesa ka qenë me dëshirë dhe është miratuar nga prindërit e saj.
Prindërit e vajzës, që kanë ardhur nga Miloti në Korçë para një viti dhe janë vendosur aty me D.K., nënvizojnë se për komunitetin e tyre, martesa e hershme dhe lindja e fëmijëve nga vajzat e mitura janë praktika të zakonshme. Ata kërkojnë lirimin e dhëndrit të tyre, duke theksuar se këtë lloj martese dhe sjellje e konsiderojnë normale për komunitetin Rom, në të cilin janë rritur dhe kanë jetuar.
Martesat e hershme janë një fenomen shqetësues në Shqipëri, kryesisht brenda komuniteteve Rom e Egjiptian ose në zonat rurale të thella. Shpesh, këto martesat nuk regjistrohen ligjërisht dhe përfshijnë vajza të mitura, që shpesh janë të pa mbrojtura dhe të pafuqishme për të kërkuar ndihmë.