Arsid Hoxha është viktima e dytë e ngjarjes së rëndë të ndodhur mbrëmjen e djeshme në Velipojë, ku 22-vjeçari dhe Ersid Ishmi u vranë me armë zjarri nga vëllezërit Eduard dhe Gëzim Frroku.
I riu ishte punonjës në hotelin “Lakaj”, në pronësi të vëllezërve Eduard dhe Gëzim Frroku, ndërsa raportohet se gjeti vdekjen aksidentalisht pasi nuk ishte i përfshirë në konfliktin që kishte Ishmi dhe dy vëllezërit Frroku.
Gjithçka nisi në qershor të këtij viti kur Ishmi kërcënoi me armë kuzhinierin e hotelit të vëllezërve Frroku. Më 28 Qershor, Ishmi kishte pasur një zënkë me kuzhinierin e hotelit dhe e kishte kërcënuar atë me armë, një incident që ka gjasa të ketë ndezur përplasjen që u shndërrua në tragjedi.
Në lidhje me ngjarjen, policia ka arrestuar Mario Palin dhe Zyber Zagrad, punonjës të hotelit, të cilët akuzohen si bashkëpunëtorë të autorëve, pasi nuk e raportuan ngjarjen edhe pse ishin dëshmitarë okularë.
Ndërkohë, dy vëllezërit Eduard dhe Gëzim Frroku vijojnë të jenë në kërkim si autorët e ngjarjes.