Drejtuesi i Policisë së Tiranës, Tonin Vocaj, ka dhënë një prononcim të detajuar për mediat në lidhje me atentatin e ndodhur sot në mesditë në Komunën e Parisit, ku efektivi i policisë Erjon Goxhara plagosi 45-vjeçarin Lorenc Kosta.
Vocaj ka deklaruar se nga hetimet paraprake rezulton se Goxhara nuk ka pasur qëllim të vrasë viktimën, pasi e ka qëlluar në pjesën e poshtme të trupit. Ai shtoi se ka biseduar me efektivin dhe se Goxhara ndodhet në një gjendje të rënduar psikologjike. Vocaj theksoi se, megjithatë, Goxhara është ende në kërkim dhe u bëri thirrje të gjithë qytetarëve dhe medieve për të ndihmuar në dorëzimin e tij.
“Rreth orës 14:00, E.G., një punonjës i policisë në strukturat për Migracionin në Tiranë, ka plagosur një 45-vjeçar, Lorenc Kosta. Policia është angazhuar në veprimet e domosdoshme hetimore dhe po punojmë për të lokalizuar autorin,” tha Vocaj. Ai konfirmoi se arma e shërbimit është përdorur në këtë rast dhe se motivet e incidentit janë të dobëta, ndoshta të lidhura me një konflikt personal.
Vocaj shtoi se hetimet janë ende në zhvillim dhe që i plagosuri nuk është në rrezik për jetën. Ai gjithashtu bëri të ditur se efektivi i dyshuar ka qenë jashtë orarit të punës në momentin e ngjarjes dhe se është duke u përpjekur të kontaktojë me të për të shmangur ndonjë veprim tjetër ndaj vetes.
“Po punojmë për të kapur efektivin dhe i bëjmë thirrje atij që të dorëzohet sa më shpejt. Ne jemi duke shpenzuar energji për të siguruar kapjen e tij dhe për të mbrojtur sigurinë publike. Siç duket, i plagosuri nuk është në rrezik për jetën dhe besojmë se në orët e pasdites do të kemi një komunikatë më të plotë në lidhje me situatën,” përfundoi Vocaj.