Pas vrasjes së 39-vjeçarit Faton Hajrizi në Serbi, janë shfaqur shumë spekulime dhe dyshime rreth ngjarjeve që ndodhën pas vdekjes së tij. Ka pasur pretendime se trupi dhe fytyra e Hajrizit janë dëmtuar në mënyra të ndryshme edhe pas vrasjes. Megjithatë, këto pretendime janë hedhur poshtë që në ditën e parë kur ka nisur autopsia në Institutin e Mjekësisë Ligjore.
Sipas raportimeve nga mediat kosovare, duke iu referuar burimeve të afërta me procesin e autopsisë, është konfirmuar se nuk ka pasur dëmtime të trupit të Hajrizit përveç dëmtimeve që ndodhin natyrshëm tre javë pas vdekjes. Autopsia ka zbuluar se Faton Hajrizi është qëlluar nga largësia në kokë, këmbë dhe trup. Për më tepër, është hedhur poshtë edhe ideja se Hajrizi mund të ketë kryer vetëvrasje.
Një moment emocional ka ndodhur kur nëna e Fatonit është afruar te trupi i tij. Sipas burimeve, ajo e puthi në ballë dhe bisedoi me të, por nuk derdhi asnjë pikë loti, ndërsa të pranishmit e tjerë nuk e mbajtën dot veten.
Rezultatet përfundimtare të autopsisë priten të publikohen në një periudhë të ardhshme. Ndërkohë, Faton Hajrizi do të varroset të dielën në Klinë të ultë të Skenderajt, në orën 14:00.