Policia italiane ka vënë në pranga 41-vjeçarin shqiptar, Ervin Sopi, i cili arriti t’i zhvaste 18 mijë euro një shtetasi italian, duke u shtirur si vajzë gjatë bisedës në ‘Messenger’. Ngjarja e pazakontë mendohet të jetë ‘dirigjuar’ nga shqiptari, i cili ishte dhe organizatori i grupit por mashtrimet e tilla i kryente së bashku edhe me 2 persona të tjerë, të arrestuar po ashtu.
Viktima e mashtrimit tregoi që prej 10 muajsh kishte një lidhje virtuale në “Messenger” me një ‘vajzë’ shqiptare. Në mesazhe, Ervin Sopi, shqiptari që shtirej si vajzë, i kishte thënë se ishte në vështirësi financiare dhe për këtë arsye i kishte kërkuar ndihmë.
Me shpresën për të nisur një lidhje romantike me vazjën shqiptare, shtetasi italian, pre e mashtrimit, i dërgoi rreth 13 mijë euro fillimisht në llogari bankare.
Kur shtetasi italian vendosi të ndërpresë të gjitha marrëdhëniet me gruan e pretenduar, filluan kërcënimet pas të cilave viktima e mashtrimit dha edhe katër mijë euro të tjera, dhe më pas ndërroi numrin e telefonit. Ky nuk do të ishte fundi, pasi kërcënimet vijuan në numrin e telefonit te babait të italianit.
Të rraskapitur babë e bir pranuan t’u jepnin edhe një mijë euro dhe në momentin e dorëzimit, fotografuan dy bashkëpunëtorët që u arrestuan nga policia.