Janë të shumtë shqiptarët të cilët përfliten si “kapo” të bandave kriminale dhe “Koka” të trafikut të drogës në Evropë, e deri në Amerikën Latine.
Por së fundmi, një tjetër emër ka hyrë në regjistrat e prokurorëve të antimafies për shkak të pozicionit të tij dhe rritjes së menjëhershme. Bëhet fjalë për shtetasin Artur Ndreka, një person që në momentin e prangosjes, një javë më parë ka bërë bujë të madhe.
Sipas të dhënave, pas prangosjes së Arben Zogut dhe Dorian Petokut, Ndreka është konsideruar dhe njohur si “shefi”.
Në Romë, njerëzit e tij e quanin “Capo”, ndërsa ai konsiderohet si “oficer i lartë i krimeve”, i rritur nën krahun mbrojtës të bosëve më të njohur shqiptarë në territorin e kryeqytetit, si Arben Zogu, Dorian Petoku dhe Petrit Bardhi.
Mirëpo, mbretërimi i tij përfundoi të hënën e kaluar. Një hetim nga Prokuroria Publike dhe Guardia di Finanza, për trafik ndërkombëtar droge, ka sanksionuar fundin e perandorisë së sapolindur të krimit. Tashmë, Ndreka ndodhet brenda një burgu, së bashku me të vëllain, si dhe me krahun e djathtë të tij, një person që njihet me emrin Mark.
Veprimi i tij kriminal ishte shtrirë në kuadratin jugor të Romës: Acilia dhe Vitinia ishin sheshet e trafikut të drogës, ku në krye të një bande prej 8 personash, ai shiste drogë në lumenj si të ishte një treg. Një lojë e thjeshtuar edhe nga momenti historik, me tre bosët e mafies shqiptare të arrestuar, që e lejoi Ndrekën të ngjitej me shpejtësi në majën e piramidës ballkanike. Ai ishte “Bosi” dhe pikë! Ai ishte ky për njerëzit e tij dhe figura e tij nuk ishte e mundur të diskutohej asnjëherë.
Nga përgjimet e Guardia di Finanza-s në Piazzale Clodio, del një pamje e qartë e veprimit kriminal të shqiptarit këtu në Romë. Kontrolli mbi territorin, shitja e drogës, hierarkia e ngurtë brenda grupit dhe kontaktet me bosët shqiptarë, që i dhanë forcë dhe prestigj brenda botës së krimit, deri në kontrollin total të strukturës së ndërtuar nga kriminelët shqiptarë.