Detaje të reja janë zbardhur në lidhje me tragjedinë që ndodhi mëngjesin e sotëm në Greqi, ku një 43-vjeçar vrau ish-bashkëshorten e tij dhe veten.
Sipas mediave greke, 43-vjeçari hyri në shtëpinë e ish-gruas ku ndodhej vajza e tyre 13-vjeçare, ndërsa djali i ish-çiftit ishte në shtëpinë e gjyshërve nga ana e të atit. 43-vjeçari, i cili kishte me vete një pushkë gjuetie, duke bërtitur dhe kërcënuar i tha ish-gruas së tij se nëse nuk kthehej menjëherë në shtëpi do të vriste vajzën e tyre.
“Hajde, ose do të të vras”-, tha ai.
Fëmija i frikësuar i kishte dërguar mesazh një fqinjeje dhe ajo kishte arritur ta nxirrte nga shtëpia duke mbyllur autorin brenda. Ai vazhdoi në një furi kërcënimesh derisa 36-vjeçarja u kthye në shtëpi me makinë. Më pas, 43-vjeçari mundi të dilte nga shtëpia e mbyllur, u hodh nga ballkoni mbi kofanon e makinës dhe qëlloi ish-gruan pa u menduar nga xhami i përparmë i mjetit.
Pasi vrau ish-gruan, 43-vjeçari qëlloi edhe veten. Megjithatë, sipas informacioneve të deritanishme, ajo që shkakton habi të madhe është se asnjë nga banorët që kanë dëgjuar se çfarë po ndodhte, nuk ka lajmëruar policinë.