Gjykata e Tiranës liroi Jorgaq Thëngjillin, i cili u hetua nga prokuroria e Tiranës për një aksident te Kryeministria, ku të plagosur mbetën dy persona.
Gazetarja Anila Hoxha raporton se gjashtë muaj pas aksidentit ku u dëmtuan dy qytetarët K. Doko dhe D. K , një aktekspertizë e dërguar nga mjekësia ligjore ka dalë në konkluzionin se të dëmtuarit ishin plagosur lehtë. Prokurori ndryshoi kualifikimin e veprës nga plagosje e rëndë në të lehtë dhe kjo vepër është në rrezen e amnistisë.
Avokatja Gjustina Golloshi i tha gazetares Anila Hoxha se kërkoi zëvendësimin e masës se aktet e ekspertimit nuk i përgjigjen më kushteve të masës. Prokurori, bazuar në këtë dokument, pra në cilësimin e veprës, ka kërkuar gjithashtu pushimin e hetimeve. Pas lirimit në sallën e gjykatës të 22-vjeçarit, gjykata do të shprehet për pushimin e çështjes për shkak të amnistisë në një datë tjetër.
Aksidenti ndodhi më 5 nëntor të vitit 2023, pranë godinës së kryeministrisë, ku i riu, duke drejtuar me shpejtësi të lartë mjetin e tij “Mercedez Benz”, përplasi dy persona. Fatmirësisht, dy të aksidentuarit ishin jashtë rrezikut për jetën. Më vonë, u zbulua se në fakt Thëngjilli ishte një shkelës “serial” i rregullave të qarkullimit rrugor, pasi ishte gjobitur plot 20 herë.