Një 30-vjeçar i identifikuar si Luvio Shtora është arrestuar në Durrës pasi akuzohet për shitje të drogës.
Autori ia ka mbathur me vrap sapo ka parë forcat e policisë edhe pse nuk ia ka dalë dot të largohet sepse “Shqiponjat” e kapin. Gjithashtu gjatë momentit kur po largohej ai ka hedhur pas edhe një qese me lëndë narkotike.
Policia gjatë kontrollit ka gjetur sasi të tjera droge duke i sekuestruar për provë materiale.
NJOFTIMI:
Shërbimet e Forcës së Posaçme Shqiponja në bashkëpunim me Seksionin për Hetimin e Narkotikëve në DVP Durrës, bazuar në inteligjencën policore se një shtetas në lagjen nr.7 në Durrës, shiste lëndë narkotike, organizuan punën dhe falë veprimeve operacionale kapën në flagrancë dhe vunë në pranga shtetasin:
L. Sh., 30 vjeç, banues në Durrës. Ky shtetas kur konstatoi punonjësit e Policisë tentoi të largohej me vrap dhe hodhi në tokë qesen me lëndë narkotike, por nuk mundi dot të largohej pasi u kap dhe prangos nga forcat Shqiponja.
Gjatë kontrollit fizik, shërbimet e Policisë i gjetën atij, një sasi lënde narkotike kanabis e cila u sekuestrua në cilësinë e provës materiale.