Katër persona kanë rënë në prangat e policisë në kryeqytet, për akuzën e shitjes së lëndëve narkotike
Në pranga ra Gazmend Hoxha, 50 vjeç, banues në Tiranë, i cili u arrestua për veprat penale “Prodhimi dhe shitja e narkotikëve” kryer në bashkëpunim dhe “Mosbindja ndaj urdhrit të punonjësit të policisë së rendit publik”.
Shërbimet e Policisë kanë lokalizuar në rrugën “Kasem Shima”, një automjet tip “Benz”, dhe gjatë të tij, në bagazh, gjetën dhe sekuestruan 2 çanta të mbushura me lëndë të dyshuar narkotike kanabis me peshë 19.30 kg, ndërsa 50-vjeçari gjatë ndërhyrjes, ka kundërshtuar punonjësit e Policisë dhe nuk është bindur ndaj urdhrave të tyre.
Aleksandër Kili, 37 vjeç, banues në Tiranë, u arrestua për veprat penale “Prodhimi dhe shitja e narkotikëve” kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”;
Gjatë kontrollit të banesës së tij, shërbimet e Policisë, gjetën një armë zjarri pushkë, 200 fara të dyshuara narkotike kanabisi. Lënda narkotike së bashku me sendet e tjera të jashtëligjshme, 2 automjete e 7 aparate celular, u sekuestruan në cilësinë e provës materiale.
U arrestuan edhe Saimir Gerbaj, 54 vjeç, dhe Orgest Beqo, 43 vjeç, të dy banues në Tiranë, për veprën penale “Prodhimi dhe shitja e narkotikëve” kryer në bashkëpunim.
Gazetarja Dorjana Bezat mëson se droga është kultivuar në jug të vendit, në ambiente të mbyllura me llampa. Droga do sillen në Tiranë me dy automjete të ndryshme, ndërsa dy të tjerët do të monitoronin rrugën. Kanabisi sillej në Tiranë ku dhe do të ndahej me doza.