Policia e kryeqytetit ka vënë në pranga, djalin e ‘gjeneralit të bandës famëkeqe në Tiranë’, Nehat Kullës. Mësohet se Robert Kulla është arrestuar për dhunë në familje.
Paraprakisht sipas policisë, dyshohet se 43-vjeçari se ka dhunuar njerkën e tij. Ndaj tij rëndojnë 3 vepra penale “Dhuna në familje”, “Vetëgjyqësia”, dhe “Veprime në kundërshtim me vendimin e gjykatës”.
“Specialistët për Hetimin e Krimeve të Komisariatit të Policisë Nr. 4 arrestuan shtetasin R. K., 43 vjeç, banues në Tiranë, për veprat penale ‘Dhuna në familje’, ‘Vetëgjyqësia’, dhe ‘Veprime në kundërshtim me vendimin e gjykatës’.
Ky shtetas dyshohet se ka ushtruar dhunë psikologjike ndaj bashkëshortes së babait të tij, e cila është e pajisur me urdhër mbrojtje dhe me vetëgjyqësi i ka thyer çelësin e bravës”, thotë policia.
Po kush është Robert Kulla?
Robert Kulla, përveçse djali i të ashtuquajturit “gjenerali” Nehat Kullës, nuk është një emër i panjohur për policinë. Ai është arrestuar në shtator të 2016 si autor i dyshuar i një banke të nivelit të dytë në zonën e ish-Bllokut në Tiranë, më 9 gusht të 2016.
Në shtëpinë e Kullës në atë kohë policia gjeti disa mijëra euro të cilat dyshoheshin se ishin grabitur në bankën e nivelit të dytë.
Por prokuroria gjatë kësaj kohe nuk arriti të vërtetojë se paratë ishin të bankës dhe për këtë arsye kërkoi lirimin e tij disa ditë pas arrestimit.