Teksa në ujërat e lumit Buna në Shkodër ende vijojnë kërkimet intensive për trupat e Alma Arrazit dhe djalit të saj 3-vjeçar, të tjera detaje dalin mbi ngjarjen e rëndë.
Teksa sot u krye ceremonia mortore e vajzës 9-vjeçare, trupi i të cilës u gjet i pari, Erdgys Arrzi nuk mori pjesë. Fillimisht u pretendua se nuk ishte lejuar nga Prokuroria, pasi ai u arrestua si shkaktari i tragjedisë, megjithatë kjo nuk është e vërtetë.
Tashmë, është zbardhur dokumenti ku Prokuroria e Shkodrës ka dhënë pëlqimin e saj për kërkesën e bërë nga Erdgys Arrazi, për të marrë pjesë në varrimin e vajzës së mitur, e cila u gjet e pajetë në lumin Buna.
Por pavarësisht lejes së dhënë nga Prokuroria, sipas vëllait të Erdgys Arrazit, ky i fundit nuk është lejuar nga policia të marë pjesë në varrim.
Përmbajtja e plotë e shkresës së Prokurorisë:
Në përgjigje të kërkesës suaj, ku kërkoni leje të veçantë për të marrë pjesë në ceremonine mortore të vajzës së mitur Ergesa Erdgys Arrazi në datën 06.05.2024 ora 14:00, për të arrestuarin Erdgys Arrazi, i cili është ndaluar në datën 05.05.2024 për kryerjen e veprës penale “Shkaktimi i vetëvrasjes” parashikuar nga neni 99 i Kodit Penal, ju bëjmë me dije së bazuar në parashikimet ligjit 81/2020 “Për të Drejtat dhe Trajtimin e të Dënuarve me Burgim të Paraburgosurve” dhe “Rregullores së Përgjithshme të Burgjeve”, kompetent për dhënien e lejeve te veçanta është Drejtori i Institucionit ku mbahet personi i ndaluar, i cili merr pëlqimin e prokurorit.
Organi procedues jep pëlqimin që personi nën hetim të lejohet të marrë pjesë në ceremoninë mortore, nëse nga ana e Drejtorisë Vendore të Policisë Shkodër garantohet siguria dhe rendi gjatë shoqërimit te tij, ndalohet komunikimi me çdo person tjetër dhe sigurohet rikthimi i ti në dhomat e sigurisë ku mbahet i ndaluar, menjëherë pas përfundimit të ceremonisë mortore. Sa më sipër, ju lutem te drejtoheni në institucionin kompetent, për shqyrtimin e kërkesës suaj.