I ftuar në MCN TV, gazetari Arjan Çani foli për një lloj shthurje të Partisë Demokratike për të cilën ndan përshtypjen se do të vazhdojë edhe sikur Sali Berisha të ikte nesër nga PD.
Më tej, Çani tha se Berisha është më shumë alibi se sa shkak i shthurjes.
“Nuk i besoj ata deputetë që nuk shkojnë as me grupin Berisha dhe as me Alibeaj. Ata ndihen thjesht të pavlefshëm, të papërfillur se nuk i njeh kush dhe ata thonë se kjo është hera e fundit që jemi deputet.
Mund të krijohet pol tretë, i katërt apo i pestë. Në fund të kësaj loje dy do jenë grupet kryesore berishistët dhe amerikanët e PD-së, ata që kanë alibi se ne me Amerikën nuk prishemi. Do kemi një parti sovraniste, berishistët dhe një parti tjetër që do jenë fasada e pushtetit, të përkëdhelurit e amerikanëve, për një periudhë, pastaj do zhduken dhe do rishfaqen prapë. Herë pas herë në politikë janë shumë të rëndësishme stacionet politike.
Ata e dinë shumë mirë se deri në vitin 2029 e kanë të pamundur të vijnë në pushtet dhe thonë kemi kohë, e kanë me nge, nuk kanë një objektiv, një qëllim. Qëllimi i tyre është të rrinë atje të shijojnë vitet që iu kanë ngelur deri në 2025 dhe kështu do shtyhet kjo histori. Është fiks një skenar i përgatitur prej kohësh me shumë kujdes që opozita në Shqipëri të përçahet me kujdes për vite e vite të tëra.”
I pyetur nëse me kandidimin për kryetar Sali Berisha po mbyt me duart e veta foshnjën që lindi nga Foltorja, Çani tha se nuk po e mbyt, por po e lind.
Për të mbrojtur këtë qëndrim ai deklaroi se hallin e tij personal Berisha arriti ta kthejë në gur bashkimi për njerëzit që e duan.
Sipas tij, Berisha e ka thënë se do të jetë kryetar i PD, nuk e ka fshehur qëllimin e tij që në fillim të Foltores.
“Nuk mund të jetë foshnjë e mbytur, është foshnjë e lindur. Grupi që sot mbështet Berishën është grup i guximshëm shumë. Janë 15 deputetë që e mbështesin shumë. Në atë parti është futur sherri, është sponsorizuar në mënyrë të tillë që të mos shuhet kurrë. Edhe me largimin e Berishës s’ka shanse për bashkim. Si mund të ndodhë? Edhe po të ikë Berisha, ai grup mendoni se do mbështes Alibeaj?
Sherri do bëhet edhe më i madh. Në këtë ditë Berisha është përbashkues. Duhet ta shohim ndryshe ekuacionin.”