Detaje të reja janë zbardhur në lidhje me grupin kriminal që trafikonte emigrantë nga vendet e treta në Shqipëri, i cili u godit nga policia.
Mësohet se grupi i strukturuara kriminal përbëhej nga me 26 persona dhe funksiononte me dy ndarje.
Grupi i parë merrej me sigurimin e kontratave në mënyrë fiktive dhe pajisjen me viza pune, ndërsa grupi tjetër merrej me kalimin e emigrantëve të paligjshëm nga Shqipëri në drejtim të Kosovës dhe më pas në Serbi, me destinacion përfundimtar vendet e Bashkimit Europian.
Sipas hetimeve të SPAK të nisur rreth një vit më parë, në një periudhë 6 mujore në Shqipëri kanë mundur të hyjnë mbi 250 persona nga Bangladeshi të cilët punësoheshin fiktivisht në bizneset e 11 personave që u vunë në pranga, kryesisht në fasoneri.
Kundrejt pagesës prej 5 mijë euro ata vinin në Shqipëri duke ndjekur rrugën nga aeroportet e Emirateve të Bashkuara, dhe priteshin në Rinas nga anëtaret e grupit të trafikantëve.
Organizator i këtij grupi ishte biznesmeni Endri Seiti, pasi sipas hetimeve ka rezultuar se ai përdorte njohjet e tij për të bërë kontratat fiktive për emigrantët. Ai bashkëpunonte me Luan Tafallën, i cili paraqitej në Rinas për të pritur emigrantët dhe më pas i akomodonte. Tafalla më pas kontaktonte të arrestuarin Luan Sulaj, i cili siguronte transportin nëpërmjet grupit kriminal të Kukësit, për t’i kaluar emigrantët në Kosovë.
Përgjimet e SPAK, kanë provuar se në Shtator të vitit 2023, në ambientet e një restoranti, Luan Sulaj është konstatuar në shoqërinë e Tafallës, Endri Seitit dhe Lulzim Lamit. Ky I fundit siguronte kontrata të qirasë për të justifikuar akomodimin e emigrantëve, por funksiononte edhe si pritës.
Gjatë këtij operacioni, 24 persona u arrestuan dhe 2 të tjerë u shpallën në kërkim me urdhër të SPAK, mes të cilëve 4 efektivë policie.