Faqja zyrtare e Ligue 1 franceze, “Uber Eats”, tek rubrika e profilit, i ka kushtuar një artikull “Mesit të Kosovës”, Edon Zhegrova, duke e përfshirë historinë dhe rrugëtimin e tij. Dy gola dhe çmimi i lojtarit të ndeshjes. Edon Zhegrova ishte i pandalshëm kundër RC Lens në Derbin e Veriut. Kjo nuk ishte hera e parë që 25 vjeçari, i cili e festoi së fundmi ditëlindjen, ishte vendimtar në ndeshje. Përfaqësuesi kosovar i ka realizuar 5 gola dhe i ka bërë 5 asistime në 26 takime. Zhegrova u lind në Gjermani, ku prindërit e tij kishin shkuar për t’iu shmangur luftës në Kosovë në vitin 1998. Më pas, ai me familje ishin kthyer në Kosovë kur Edoni ishte dy vjeç, ndërsa në vendin e prindërve kishte nisur të merrej me futboll. Ishin rrugët e Prishtinës ku i riu Edon kishte nisur ta shfaqte talentin e tij të pashtershëm, ndërsa shpejt iu bashkua klubit lokal. Njerëzit filluan ta vinin re menjëherë. Talentin e tij e zbuloi edhe gjiganti italian, “AC Milan”, shkruan “ligue1.com”. “Një ditë në vitin 2012, AC Milan e organizoi një kamp të madh trajnimi në Kosovë. Për një javë, 200 djem ishin ftuar të bëheshin pjesë e këtyre provave. Unë mora vesh për këtë kamp vetëm në minutat e fundit. Trajneri im më dërgoi atje me shpejtësi. Më duhej të vishesha me nxitim ndërsa fëmijët tjerë ishin tashmë në fushë. Është për të qeshur, sepse u regjistrova i fundit në listë, por u zgjodha i pari. Dhe, këtu ndryshoi gjithçka për mua”, vazhdoi Zhegrova.
Takimi me yjet
Bashkë me disa lojtarë të tjerë, 12 vjeçari i atëhershëm ishte ftuar në vizitë në “San Siro” për t’i takuar yjet si Kaka e Pato, por edhe për të ushtruar me “Rossonerit” e vegjël. Në moshën 15 vjeçare, sulmuesi i krahut e kishte marrë rrugën drejt Belgjikës për t’iu bashkuar Standard Liezhit e më pas Saint-Trond, tek ekipet e të rinjve. Megjithatë, ekzistonte një pengesë, për shkak të shtetësisë së tij kosovare (Kosova nuk ishte e pranuar në UEFA e as në FIFA). Fati i tij do të ndryshonte kur skautët e Genkut e panë talentin e tij, ndërsa Zhegrova nënshkroi kontratë profesionale me klubin belg kur i mbushi 18 vjeç. I vendosur menjëherë në ekipin e parë, ylli kosovar i zhvilloi 24 ndeshje (përfshirë këtu katër në Europa League) para se të nënshkruante me ekipin zviceran, Bazel.
Kalimi dhe shkëlqimi me Lilën
Ai i kaloi më pas tri vjet në Sëiss Super League dhe bëri më shumë eksperiencë evropiane, për t’iu bashkuar Lilës në janar të vitit 2022. Pas një sezoni e gjysmë me “Les Dogues”, 24-vjeçari e ka arritur një tjetër nivel. “Në çfarë aspekti jam përmirësuar që kur kam ardhur këtu? Fizikisht dhe taktikisht, por edhe në mënyrën e të luajturit më thjeshtë. Nuk është se unë dua ta ndërroj lojën time apo aftësitë e mia që ta bëj diferencën në situatat një kundër një. Nëse e bëj një driblim, për shembull, është sepse unë e di që mund ta bëj atë”, shtoi Zhegrova. Prishtinasi u rikthye së fundmi edhe në Kombëtaren e Kosovës, ku bëri paraqitje mjaft të mira në miqësoret me Armeninë dhe me Hungarinë. Gjatë verës që po vjen, “Mesi i Kosovës” pritet ta bëjë një tjetër hap përpara në karrierë duke u transferuar në një klub më të madh evropian.