Një atentat me dy të plagosur ka ndodhur rreth orës 19:30 në fshatin Grudë e Re në Shkodër. Mësohet se të plagosurit janë Gjergj Ndershtiqaj 28 vjeç student në Akademinë e Sigurisë dhe kunati i tij 30 vjeç Gjon Nika. Ndaj makinës së tyre janë zbrazur 30 plumba. Autorët mësohet se kanë djegur automjetin e tyre dhe të plagosurve, ndërsa dyshohet se shënjestra ka qenë Gjon Nika kunati studentit të akademisë së Policisë. Gjergj Ndërshtiqaj që mbeti i plagosur në atentati në Shkodër është vëllai i drejtorit të Drejtorit të Drejtorisë së Transportit Rrugor. Dy të plagosurit po marrin trajtim në spitalin Rajonal, ndërsa në Shkodër kanë mbërritur Forcat RENEA, kryepolici Muhamet Rrumbullaku dhe Drejtori i Krimeve të Rënda, Neritan Nallbati. Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët. Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit. Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast.
Reagon policia
Ndërkohë Policia e Shkodrës ka dalë me një reagim zyrtar lidhur të shtënave me armë që lanë të plagosur studentin e akademisë së sigurisë Gjergji Ndërshtiqaj 28 vjeç si dhe kunatin e tij të identifikuar si Gjon Nika 30 vjeç. Mësohet se kemi të bëjmë me atentat të mirëfilltë ndaj të plagosurve, pasi policia ka gjetur një makinë tip “Renault”, duke u djegur pranë vendit të ngjarjes. Automjeti dyshohet se i përkiste autorëve. “Rreth orës 19:30, në afërsi të një lokali në fshatin Grudë e Re, është qëlluar me armë zjarri shtetasi Gj. N., rreth 30 vjeç. Si pasojë e të shtënave është plagosur edhe kunati i tij, shtetasi Gj. N., 28 vjeç, student në Akademinë e Sigurisë. Të dy këta shtetas janë transportuar në spital, për ndihmë mjekësore. Në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër. Në ndihmë të Policisë vendore janë nisur disa grupe të Forcës Kombëtare të Sigurisë dhe të RENEA-s, si dhe specialistë nga Departamenti i Policisë Kriminale në Policinë e Shtetit. Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët. Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit. Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast”, njoftoi dje policia.
Zbardhen detaje nga vrasja e Grei Bihucit në Fier, arrestohet edhe një 17-vjeçar
Nga ana tjetër, janë zbardhur dje detaje të reja nga vrasja e 19 vjeçarit Grei Bihuci, i cili mbeti i vrarë dy ditë më parë në qendër të qytetit të Fierit, pas një sherri me moshatarët e tij. Sipas policisë, është arrestuar dhe një tjetër 17-vjeçar i cili në bashkëpunim me 18 vjeçarin Florian Muka kanë vrarë Bihucin. Policia njoftoi se në vendin e ngjarjes janë gjetur një thikë dhe një përforcues grushti, të cilat janë sekuestruar. “Në vijim të informacionit paraprak të dhënë ditën e djeshme, për ngjarjen e ndodhur rreth orës 11:30, në bulevardin “Jakov Xoxa”, Fier, informojmë se në vijim të veprimeve hetimore dhe procedurale të kryera nga specialistët për Hetimin e Krimeve të Rënda të DVP Fier, në drejtimin e Prokurorisë, u arrestuan në flagrancë shtetasit 18 vjeç, banues në Fier dhe 17 vjeç, banues në fshatin Kallm i Madh, Fier. Nga veprimet hetimore dyshohet se këta 2 shtetas, në bashkëpunim me njëri-tjetrin, pas një konflikti për motive të dobëta, kanë vrarë me mjet prerës (thikë), shtetasin 19 vjeç, dhe kanë plagosur shtetasin 20 vjeç, i cili është në spital, jashtë rrezikut për jetën. Në cilësinë e provës materiale janë sekuestruar një mjet prerës (thikë) dhe një përforcues grushti, të cilat janë gjetur në vendin e ngjarjes”, njoftoi dje policia. Konflikti mes të rinjve thuhet se ka nisur për shkak të opsionit “like” ndaj një vajze në rrjetet sociale, të cilët e njihnin të dy djemtë e rinj.