Dy kandidatë për kryetar bashkie janë qëlluar për vdekje brenda pak orësh në qytetin meksikan Maravatio, përpara zgjedhjeve kombëtare të 2 qershorit. Sulmi ndaj politikanëve ndodhi në shtetin perëndimor të Michoacan, i cili është një nga rajonet më të dhunshme të Meksikës.
Miguel Angel Reyes Zavala, një gjinekolog që donte të drejtohej me partinë Morena të Presidentit Andres Manuel Lopez Obrador u qëllua për vdekje në automjetin e tij jashtë klinikës së tij. Sipas dëshmive të dëshmitarëve të mbledhura nga grupi hetues, dy persona të armatosur qëlluan në distancë dhe më pas u larguan me një makinë.
Disa orë më vonë, Armando Perez Luna, i cili shpresonte të përfaqësonte Partinë e Veprimit Kombëtar (PAN) në opozitë, u gjet i vdekur në një makinë me shenja të shtënash armësh në trup. Motivet e ngjarjes nuk dihet dhe janë ende të paqarta në këtë fazë të hetimeve. Sipas njoftimeve të shtypit, më shumë se dhjetë kandidatë janë vrarë para fillimit të fushatës zgjedhore në prag të 2 qershorit, kur do të zhvillohen zgjedhjet lokale, rajonale, parlamentare dhe presidenciale.
Shumica e viktimave ishin kandidatë në zgjedhjet lokale. Fushata zgjedhore nis të premten e 1 mars, por në praktikë kandidatët kanë “luftuar” prej muajsh. Tashmë konsiderohet e sigurt se, për herë të parë në historinë e vendit, një grua do të zgjidhet në qershor në krye të ekonomisë së dytë të Amerikës Latine, e cila në thelb është e orientuar drejt SHBA-së.
Ish-kryetarja e kryeqytetit meksikan dhe kandidatja e koalicionit për presidencën, Claudia Sheinbaum, konsiderohet si kandidatja kryesore, sipas sondazheve. Kundërshtari i saj kryesor është senatori konservator Socil Gálvez, kandidat i një koalicioni trepartiak opozitar në spektrin nga qendra e majtë në qendrën e djathtë.