Një 35-vjeçar është vënë në pranga ditën e sotme në Vlorë, pasi akuzohet se kishte plafikuar të vriste një person.
Mësohet se në pranga ka rënë Muarrem Koroveshi, i vili akuzohet se në bashkëpunim me 2 persona të tjerë të shpallur në kërkim, po planifikonin të vrisnin në Vlorë Ines Hajrullën Më tej në njoftim bëhet me dije se ata kishin siguruar kushtet dhe mjetet për të kryer një vrasje. Nga ky operacion janë shpallur në kërkim edhe dy persona ku po punohet për kapjen e tyre.
Ines Hajrulla është djali i biznesmenit vlonjat, Robert Hajrulla, teksa ai ka qenë shënjestër e atentateve dhe më parë. Më 10 maj të 2019 në Vlorë, Inez Hajrulla u shpëtoi plumbave që u qëlluan nga një automjet në lëvizje. Si pasojë e këtyre të shtënave është plagosur rastësisht Dajko Canodemaj, i cili ka qenë duke pirë kafe, pranë Hajrullës.
Nga ana tjetër, 27-vjeçarit i është bërë atentat edhe në nëntor 2017, teksa iu vendos tritol në makinë po në lagjen ”Hajro Çakërri”. Ai humbi të dyja këmbët duke vendosur proteza, po shpëtoi. Pas ngjarjes ai u arrestua, pasi policia i gjeti një armë pa leje. Burimet policore thanë në atë kohë se shkak për atentatin me tritol ishin mosmarrëveshjet me një grup tjetër pas humbjes së një ngarkese me hashash në Itali.
Njoftimi i plotë:
Zhvillohet nën drejtimin e SPAK-ut operacioni policor i koduar “Trekëndëshi”, nga Drejtoria për Hetimin e Krimeve të Rënda në Departamentin e Policisë Kriminale, me mbështetje të Forcës Kombëtare të Sigurisë dhe Drejtoritë Vendore të Policisë Vlorë dhe Tiranë, Strukturat e Policisë së Shtetit, në bashkëpunim me SPAK-un, zhvilluan operacionin policor të koduar “Trekëndëshi”, për ekzekutimin e vendimit penal të Gjykatës së Posaçme të Shkallës së Parë për Korrupsionin dhe Krimin e Organizuar, për 3 shtetas.
Gjatë operacionit, u bë ekzekutimi i urdhrit të prokurorit të Prokurorisë së Posaçme të Shkallës së Parë për Korrupsionin dhe Krimin e Organizuar, për ekzekutimin e vendimit të Gjykatës së Posaçme të Shkallës së Parë për Korrupsionin dhe Krimin e Organizuar, për shtetasin M. K. alias M. I. alias M. M., 35 vjeç, banues në Vlorë. Gjithashtu, në funksion të këtij vendimi penal u bë shpallja në kërkim e shtetasve L. Z. dhe E. Z.
Gjykata e Posaçme e Shkallës së Parë për Korrupsionin dhe Krimin e Organizuar, në muajin shkurt 2024, ka caktuar masën e sigurisë “Arrest në burg”, për këta shtetas, pasi dyshohen për kryerjen e veprave penale “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunimin e posaçëm të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”. Vijon puna për kapjen e 2 shtetasve të shpallur në kërkim. Materialet procedurale do t’i kalojnë Prokurorisë së Posaçme të Shkallës së Parë për Korrupsionin dhe Krimin e Organizuar, për veprime të mëtejshme.