Kalendarit festiv të Shqipërisë që nga java e kaluar i është shtuar një tjetër festë zytare 22 nëntori, dita e Alfabetit të Gjuhës Shqipe.
Edhe pse sërish seanca plenare zgjati jo më shumë se 15 minuta, mes kaosit dhe tensioneve të krijuara, mazhorancës i mjaftuan për të kaluar propozimin për të shpallur 22 Nëntorin, një festë zyrtare.
Dita e Alfabetit të Gjuhës Shqipe do të jetë ditë pushimi duke nisur nga ky vit. Kongresi i Manastirit shënohet si ngjarja më e madhe historike e kombit tonë dhe vlerësohet për rëndësinë e tij të institucionalizimit të alfabetit të gjuhës shqipe.
Numri i festave zyrtare tani shkon në 15, një ditë më shumë pushimi për administratën publike. Ministri Hasani më herët theksoi se 22 Nëntori ka një simbolikë të veçantë, si dhe specifikon momentin më të madh unifikues të shqiptarëve.
“Është një ditë me simbolikë të veçantë, 22 Nëntori përfaqëson momentin më të madh unifikues të shqiptarëve që janë shpërndarë pothuajse në të gjitha vendet e Ballkanit, janë të përfaqësuara në të gjitha fetë monoteiste, por ajo që i ka bashkuar dhe vazhdon t’i bashkojë është gjuha dhe fakti që në Kongresin e Manastirit zgjodhën të shkruajnë dhe të identifikohen në këtë gjuhë të bukur dhe të shenjtë me alfabetin latin.
E kemi marrë këtë iniciativë, bazuar në diskutimet që kemi patur pas Samitit të Diasporës. Kryeministrimi i Shqipërisë e njoftoi në prani të të gjithë përfaqësuesve të Diasporës Shqiptare, por duke patur parasysh edhe faktin që ky vit 2024, është një vit shumë i rëndësishëm për të gjithë shqiptarët në rajon, ku Shqipëria shpreson që të ketë një rrugë sa më të qartë e sa më të shpejtë në procesin e integrimit në Bashkimin Evropian, por edhe Shqiptarët e Maqedonisë së Veriut dhe ata të Kosovës, Preshevës apo të Malit të zi, janë në procese të rëndësishme përfaqësuese dhe integruese”.
Kryediplomati shqiptar tha se së bashku me Ministrinë e Arsimit është përgatitur një kalendar i rëndësishëm eventesh për vitin 2024 të lidhura me gjuhën shqipe.
Kalendari i festave zyrtare në Shqipëri për vitin 2024
01 janar 2024 Festat e Vitit të Ri
02 janar 2024 Festat e Vitit të Ri
14 mars 2024 Dita e Verës
22 mars 2024 Dita e Nevruzit
31 mars 2024 E diela e Pashkëve Katolike*
10 prill 2024 Dita e Bajramit të Madh**
01 maj 2024 Dita Ndërkombëtare e Punëtorëve
05 maj 2024 E diela e Pashkëve Ortodokse*
16 qershor 2024 Dita e Kurban Bajramit**
05 shtator 2024 Dita e Shenjtërimit të Shenjt Terezës
22 nëntor 2024 Dita e Alfabetit të Gjuhës Shqipe
28 nëntor 2024 Dita Flamurit dhe e Pavarësisë
29 nëntor 2024 Dita e Çlirimit
08 dhjetor 2024 Dita Kombëtare e Rinisë
25 dhjetor 2024 Festa e Krishtlindjeve.
Në seancën e sotme gjithashtu mes bilbilave dhe kaosit të krijuar nga deputetët opozitar, Kuvendi i Shqipërisë i dha “OK” projektligjit “për disa shtesa dhe ndryshime në ligjin nr.155/2015, “Për lojërat e fatit në Republikën e Shqipërisë”, të ndryshuar”.
Propozimi u miratua vetëm me votat e socialistëve në tërësi dhe nen për nen (34 nene). Të vetmit që abstenuan nga radhët e socialistëve janë ish-ministri i Brendshëm, Fatmir Xhafaj, dhe deputeti Erjon Braçe, ndërsa në sallë mungonte kryeministri Edi Rama.