Kreu i qeverisë shqiptare, Edi Rama, reagoi dje pas protestës së dhunshme në selinë e PD-së dhe përplasjes Basha-Berisha.
Në një postim në Twitter, kryeministri shkruajti me ironi se bëhet fjalë për “dy kufoma politike që fajësojnë njëra tjetrën se kush është shërbëtori im”.
Ai gjithashtu u bëri thirrje demokratëve që të mos merreshin me dyshen Basha-Berisha, por t’i bashkoheshin atij për të ndërtuar një Shqipëri më të mirë.
“Kur shoh këto dy kufoma politike që luajnë kështjellash në mes të Tiranës dhe fajësojnë njëra-tjetrën se kush është shërbëtori im, më vjen t’u lëshoj demokratëve një kushtrim të megjithëzemërt:Ejani t’i japim ç’mundemi Shqipërisë, të bashkuar si shqiptarë, si qytetarë, si njerëz!
Lërini në fatet e parashkruara humbësin kronik të selisë blu dhe personazhin pa seli të listës së zezë, të cilët të kujtojnë të dy fjalët e Xhokerit, “Skam asgjë për të humbur.
Asgjë s’më dhemb dot më.Tashmë jeta ime është thjesht një komedi”! Sa u shkon ai llafi… Varu teneqet!”
Dhe për këtë thirrje ka ardhur reagimi i parë nga radhët e demokratëve. Deputetja e PD, Flutura Açka ka refuzuar “ndihmën” e kryeministrit Edi Rama.
Në një postim në rrjetet sociale, Açka shkruan se demokratët do t’i zgjidhin vetë hallet e tyre.
Mjerim, ke kohë që nuk je më lajm dhe kërkon të bëhesh lajm me demokratët. Po i përgjigjesh pyetjeve të përgatitura nga zyra e Gebellsit tënd në emër të demokratëve. Shqetësimi i sotëm i shqiptarëve nuk është “dhëmbi i prishur” i demokratëve, por sarkoma e qeverisjes tënde.
Faturën me emrin tënd dhe qeverisë tënde e dinë mirë shqiptarët. Demokratët do t’i zgjidhin vetë hallet e tyre, pavarësisht hunjve, zjarrit, cianurit (figurativë) që u hedh ti me të gjitha mënyrat e tua tinzare. Bashkë me mediet që ke urdhëruar për t’ua shkatërruar imazhin.
Dhe sa për fjalime që po bën nga kali i shaluar, me fjalorin tënd vulgar permanent, dikush është mirë të ta thotë qartë: Demokratëve nuk iu ha fare Edi për Edin, madje as shqiptarëve. Sepse, ti rri i krekosur në pushtet me vota të grabitura si në asnjë demokraci t? vërtetë në botë. Meqe ra fjala, me patronazhistët kur do të bashkëbisedosh?