59-vjecari grek Christos Gialias është ekzekutuar mbrëmjen e djeshme në Mandra të Athinës.
Sipas mediave vendase, biznesmeni është vrarë me armë zjarri dhe më pas i djegur brenda mjetit të tij. Automjeti është gjetur në rrugën “Agia Aikaterini” në Mandra.
Nga hetimet e ELAS-it, pranë mjetit të djegur u gjetën gëzhoja, ndërsa brenda mjetit u gjet një kallashnikov, i cili vlerësohet të jetë arma e vrasjes që autorët e kanë hedhur pas ekzekutimit. Viktima ishte pronar i kompanive të tregtimit të mishit në Greqi ku kishte punësuar shumë shqiptarë. Në të njëjtën kohë, ai rezulton pronari i një biznesi edhe në vendin tonë, ku në vitin 2007 ai ka themeluar një kompani me qendër në Labinot Fushë të Elbasanit. Objekti i veprimtarisë së kësaj kompanie është tregtia me shumicë e pakicë e mallrave të ndryshëm industrialë, elektroshtëpiake, transport udhëtarësh, hotel dhe bar.
Nga ana tjetër, ai ishte pronar dhe agjent i tre ekipeve të futbollit në Greqi, përkatësisht AO Trikala, Paneleussiniakou dhe Mandraikos.
Mediat greke raporotjnë po ashtu se ai ishte i martuar me një grua shqiptare me origjinë nga Elbasani, pasi më herët në vitin 2018 atij i kanë ekzekutuar me armë ish-gruan greke Frederiki Karzi. Mes autorëve të vrasjes atëherë ishte një shtetas shqiptar, i cili ishte arratisur më parë nga burgu dhe motiv i ngjarjes ishte grabitja. Kur ka ndodhur vrasja, Gialias ishte ndarë me shtetasen greke dhe kishte nisur marrëdhënien me një shtetase shqiptare nga Librazhdi.
Gialias rezulton pronar biznesesh të mëdha në Greqi, ku janë të punësuar rreth 4000 persona, shumë prej të cilëve shqiptarë. Mësohet se ai qarkullonte me bodyguard, shtetas shqiptarë, të cilët në momentin e vrasjes nuk ndodheshin me të. Gialias rezulton me precedentë penalë, pasi i janë gjetur sasi të mëdha armësh, kryesisht “Kallashnikovë”. Ai gjithashtu ka precedentë në fushën e narkotikëve, si dhe në punësimin e paligjshëm të punëtorëve nga Pakistani në Greqi. Dyshimet e deritanishme të policisë kanë të bëjnë me kontrabandën e cigareve, për shkakun e së cilës janë ekzekutuar shumë krerë të mafias greke vitet e fundit. Pas këtyre vrasjeve policia ka gjetur lidhje të shtetasve nga Europa Lindore dhe Shqipëria, por nuk përjashtohen edhe pista të tjera hetimi.
Mbrëmjen e djeshme u bë e ditur se një tjetër bashkëpunëtor i Gialias ishte vrarë në 31 nëntor 2023. Bëhet fjalë për 56-vjecarin nga Berati, Thimi Droboniku alias Thimi Prifti. Ai u ekzekutuar në “Palio Faliro” të Athinës dhe vrasja e tij mbetet e pazbardhur. Nuk dihet nëse ngjarjet kanë lidhje me njëra tjetrën, por ka dyshimet se përmes një kushërirës së tij grekë, Gialias furnizonte me cigare Drobonikun. Ky i fundit kishte precedentë penalë në këtë fushë por edhe në tregtinë e kokainës. Madje edhe Gialias kryente tregti me kontejnerë nga Amerika Latine, por ende nuk ka indicie për ndonjë transport të paligjshëm narkotikësh brenda tyre.