Pas Jetnor Zhabollit i cili mbante të mbyllur gruan, nënën e tij dhe fëmijët, dje në prangat e policisë ra, 34-vjeçari Asqeri Mandri, i cili kishte bërë të njëjtin veprim.
Lidhur me këtë sociologu Gëzim Tushe, u shpreh në një intervistë televizive se një pjesë e madhe e familjeve shqiptare janë duke e humbur funksionin e tyre.
Ai tha se dhuna është kthyer kohët e fundit në një fenomen shumë të përhapur në shoqërinë tonë, madje sipas tij dhuna është demokratizuar.
“Kazani i shoqërisë shqiptare ka shumë probleme, dhe gjykoj se shoqërisë shqiptare po i shqepen tegelat e themeleve, kanë humbur funksionin e tyre. Ajo që dua të theksoj është se e gjithë problematika sociale e shoqërisë është e përqendruar tek familja, pra një pjesë e familjes shqiptare ka dalë nga binarët dhe ka të bëjë me marrëdhëniet bashkëshortore, brezave, pra është një kaos i madh social. Kanë dalë shumë problemet morale së fundmi, dhuna që është tejet e përhapur, madje është demokratizuar dhuna në shoqërinë shqiptare, po ndeshet dendur dhe jo vetën në ambiente publike por dhe në institucionet e shoqërisë, familje shkollë atje ku duhet të ndjehet më i mbrojtur njeriu po ndjehet i pambrojtur.”
Ndërsa sa i përket problemit të vetëvrasjes Tushe tha se ai është krim dhe duhet trajtuar si i tillë. Ai tha se shoqëria shqiptare është në kaos konceptual, ndërsa theksoi se mosha e pjekurisë seksuale nuk lidhet me oshën e martesës.
“Mendoj se duhet pasur kujdes dhe në interpretimin publik sepse ato që vetëvriten pa diskutim shoqëria duhet të mbajë një qëndrim moral sepse ai është krim dhe pse ja kryen vetvetes, prandaj duhet trajtuar si i tillë. Nuk është vetëvrasja rrugëdalja për t’ju larguar problemeve. Unë mendoj se shoqëria shqiptare tashmë është në një kaos të sistemit të vlerave dhe periudhat e tranzicionit janë të vështira, kjo bën që herë pas here njerëzit të jenë të çoroditur dhe ata që janë më të çoroditur janë të rinjtë.
Kjo bën pastaj që të shoqërohet dhe me një varg problemesh që mund të duken periferike por mendoj se ky është problemi që ne kemi nevojë të rregullojmë disa komponentë që kanë të bëjmë me kulturën e martesës, disiplina e sekualitetit është një nga disiplinat kryesore. Dobësimi i familjes, mungesa e komunikimit me fëmijët, ndonjëherë ekonomia e varfër, mungesa e mësimit të kulturës së martesës, seksualizmit sjell këto. Kjo kohë nuk është tamam mosha e martesës dhe shumë të reja duke mos e pasur këtë kulturë gjejnë këtë si një urë kalimi.”
Tushe shtoi se niveli prindërimit ka pësuar shumë rënie dhe se të rinjtë marrin informacione në rrugë të papërshtatshme.
“Sot kemi filluar diçka të flasim po prapë jo sistemike dhe njohuritë që marrin djemtë dhe vajzat në këtë moshë pjekurie janë në rrugë të papërshtatshme dhe kjo bën që ata ti dorëzohen rrugëve të tjera dhe sjellin këto probleme. Mendoj se shoqëria shqiptare ka nevojë për të rindërtuar një sistem për shkollën, martesën. Nuk jam dakord që shkollën ta bëjmë kokë turku, por ama është institucion i rëndësishëm dhe nëse kemi një familje që nuk funksionon dhe shkolla se luan rolin e saj atëherë fëmijët tanë bëhen viktima.
Një pjesë e mësuesve janë kthyer në rrogëtar, por ideja e mësuesit janë funksionet e lëkurës njerëzore dhe jo të rrogës. Nuk mund të kemi mësues kaq neutral dhe mendoj se dhe ata kanë mëkatet e tyre dhe duhet të mbajnë përgjegjësitë e veta, si shkolla dhe familja.”, përfundoi sociologu Tushe.