![](https://dk-news.com/wp-content/uploads/2023/11/800-0-6555fb4c5c066-1.jpg)
Një 43-vjeçar në Dibër ka rënë në prangat e Policisë, pasi Gjykata e Apelit në Tiranë e kishte dënuar me 16 vite burg për vrasje.
Lajmin e ka bërë të ditur Policia përmes një njoftimi, ku thuhet se vrasja ka ndodhur në vitin 2017.
Ndërkohë bëhet e ditur gjithashtu se në pranga ka rënë edhe një shtetas i shpallur në kërkim për “dhënien e ndihmës për kalim të paligjshëm të kufijve” ndaj emigrantëve.
Njoftimi i Policisë:
DVP Dibër-Policia ekzekuton masën e sigurisë “Arrest në burg”, për 1 shtetas të akuzuar për vrasje, si dhe ndalon 1 shtetas tjetër të akuzuar nga GjKKO-ja, për dhënie ndihmë për kalim të paligjshëm të kufirit.
Shërbimet e Drejtorisë Vendore të Policisë Dibër ekzekutuan masën e sigurisë “Arrest në burg”, për shtetasin V. (Xh.) E., 43 vjeç, banues në fshatin Pollazhan, Dibër. Gjykata e Apelit Tiranë i ka caktuar këtë masë sigurie dhe e ka dënuar me 16 vjet burg, 43-vjeçarin, pas hetimeve për vrasjen e shtetasit A. K., të kryer në vitin 2017.
Specialistët e Sektorit për Hetimin e Narkotikëve dhe Trafiqeve të Paligjshme të DVP Dibër, në bashkëpunim me shërbimet e Policisë Kufitare të PKK Bllatë, ndaluan shtetasin e shpallur në kërkim A. Xh. alias U. Z., 42 vjeç, banues në Dibër, pasi Gjykata e Posaçme e Shkallës së Parë kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprën penale “Ndihma për kalim të paligjshëm të kufijve”, kryer në bashkëpunim.
Materialet procedurale i kaluan prokurorive përkatëse, për veprime të mëtejshme.